Gəlinlə qayınana saçyoldu üstündə məhkəməlik oldu.
Shimal.News-un əldə etdiyi məlumata görə, hadisə Sumqayıt şəhərində qeydə alınıb.
Belə ki, Şabran rayon sakini Sevda Əhmədova gəlini Fatma və oğlu Coşqun Əhmədovla eyni mənzildə yaşayır. Fatma ona məxsus soyuducunu həyətə qoyub.
Qayınanası isə soyuducunun mühərrikini qonşuya peşkəş edib. Bu da tərəflər arasında ciddi mübahisəyə səbəb olub. Nəticədə Sevda gəlininin saçından tutaraq həyətdə sürüyüb. Ardınca kürək nahiyəsinə yumruqla zərbələr endirib. Sevda Əhmədova törətdiyi əmələ görə cinayət məsuliyyətinə cəlb edilib.
Sumqayıt Şəhər Məhkəməsində keçirilən prosesdə ifadə verən qayınana özünü təqsirli bilib. Onun sözlərinə görə, dava zamanı gəlini Fatma Əhmədova da ona xəsarət yetirib. Məhkəmənin yekun qərarına əsasən, tərəflər arasında barışıq əldə olunduğu üçün qayınana Sevda Əhmədova cinayət məsuliyyətindən azad edilib. Qeyd edim ki, adlar şərti verilib.
Fidan İlqar
