Kənd təsərrüfatı nazirinin müavini Elçin Zeynalov Quba və Xaçmaz rayonlarından olan vətəndaşları qəbul edib, onların müraciətlərini dinləyib, ərizə və şikayətlərinə baxıb.
Shimal.News xəbər verir ki, qəbulda vətəndaşların müraciətləri əsasən işlə təminat, əkin subsidiyasının ödənilməsi və digər məsələlərlə bağlı olub.
Nazir müavini hər bir vətəndaşın müraciətini diqqətlə dinləyib, qaldırılan məsələlərin hərtərəfli öyrənilməsi və qanunvericiliyin tələblərinə uyğun qısa müddətdə həll edilməsi üçün müvafiq tapşırıqlar verib. Vətəndaşların müraciətlərinin bir qismi yerindəcə həllini tapıb, qaldırılan bəzi məsələlər isə araşdırılması üçün nəzarətə götürülüb.
E.Zeynalov qəbuldan sonra Zərrabi kəndində salınmış intensiv meyvə bağına baxış keçirib, meyvə yığımı və qablaşdırılması prosesi ilə tanış olub. Fermerlərlə Aqrar Subsidiya Şurasının 2025-ci il üçün açıqladığı subsidiya əmsalları, çoxillik əkmələrə dövlət dəstəyi mexanizmləri, intensiv bağçılığın genişləndirilməsi istiqamətində stimullaşdırıcı tədbirlər və digər mövzularda fikir mübadiləsi aparılıb.
Nazir müavini, həmçinin Meyvəçilik və Çayçılıq Elmi Tədqiqat İnstitutuna baş çəkib, laboratoriyaların vəziyyəti ilə tanış olub, aparılan elmi tədqiqat işləri ilə maraqlanıb. Kollektivlə görüşdə institutun fəaliyyət istiqamətləri, tədqiqat işlərinin günün tələblərinə uyğunlaşdırılması, praktik təcrübi fəaliyyətin genişləndirilməsi, institutun maddi-texniki bazasının daha da yaxşılaşdırılması istiqamətində fikir mübadiləsi aparılıb.
