Ali təhsil müəssisələrinə yerləşdirmənin nəticələri açıqlanıb. “ShimalNews” xəbər verir ki, müsabiqədə ümümilikdə 82.883 nəfər iştirak edib.
Dövlət İmtahan Mərkəzi (DİM) bildirib ki, 55.656 abituriyent (o cümlədən 7287 subbakalavr) ali təhsil müəssisələrinə qəbul olunub. Onlardan 27.117 (o cümlədən 1579 subbakalavr) nəfər dövlət sifarişi əsasında, 28.539 (o cümlədən 5708 subbakalavr) nəfər isə ödənişli əsaslarla təhsil almaq hüququ əldə edib.
Ali təhsil müəssisələrinə qəbul olunan abituriyentlər 28 avqust – 6 sentyabr (saat 18:00-dək) tarixlərində portal.edu.az platformasında qeydiyyatdan keçməlidir. Daha sonra yaradılmış kabinetə daxil olduqdan sonra təqdim edilən xidmətlər sırasında “Ali və orta ixtisas təhsili müəssisələrinə təhsilalan qeydiyyatı” xidmətini seçməlidirlər.
Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilmədən imtina etməsi kimi qiymətləndiriləcək və onun qəbul haqqında əmri ali məktəbə göndərilməyəcək.
