Şamaxı və İsmayıllı rayonlarını birləşdirən Dəmirçi–Lahıc avtomobil yolunda baş verən torpaq sürüşməsi nəticəsində yol yararsız vəziyyətə düşüb.
Baku TV-nin məlumatına görə, hadisə yolun 11-ci kilometrliyində qeydə alınıb. Sürüşmə nəticəsində asfalt örtüyü tam dağılıb və nəqliyyat vasitələrinin hərəkətinə məhdudiyyət qoyulub.
Yerli sakinlərin sözlərinə görə, ərazi dağlıq və uçquna meyilli zona olsa da, əvvəlki hallarda yol operativ şəkildə bərpa edilirdi. Hazırda isə vəziyyət daha ağırdır və nə Şamaxı, nə də Lahıc istiqamətindən hərəkət mümkün deyil.
Azərbaycan Avtomobil Yolları Dövlət Agentliyindən bildirilib ki, martın 27-29-da yağan intensiv leysan yağışları nəticəsində sürüşmə prosesi aktivləşib. Nəticədə uzunluğu 40 metr, eni 30 metr olan sürüşmə sahəsi yaranıb, yolun hərəkət hissəsi 2-5 metr dərinliyində çöküb.
Qurumdan qeyd olunub ki, hazırda yol tam bağlanıb. Sürüşmə prosesi sabitləşdikdən sonra əraziyə ağır texnika cəlb edilərək bərpa işlərinə başlanılacaq. Sürücülərə həmin istiqamətdə hərəkətdən müvəqqəti çəkinmək tövsiyə olunur.
