“Quba-Xaçmaz iqtisadi rayonu ərazisində təklif olunan turizm xidmətləri ilə qiymətlər arasında bəzən mütənasiblik olmur. Burada bir çox sahibkar bayramlar, uzun sürən tətillər zamanı fürsətdən istifadə edərək qiymətləri çox artırırlar. Lakin bunu bütün zonaya da şamil etmək olmaz. Situasiyalar müxtəlifdir”.
Bu fikirləri Shimal.News-a açıqlamasında Hotellər və Restoranlar Assosiasiyasının, Azərbaycan Ekoturizm Assosiasiyasının İdarə Heyətinin sədri Samir Dübəndi deyib.
Ekspert vurğulayıb ki, turizm sosial yönümlü fəaliyyət olduğuna görə insanların istirahət hüququ təmin olunmalıdır:
“İnsanın istirahət hüququnu və yaxud sağlamlığı bərpa etmək imkanlarını realizə etmək üçün ən uyğun olan fəaliyyət turizm fəaliyyətləridir. Bunları düşünərək əminliklə deyə bilərik ki, turizmin hər kəs üçün əlçatanlığını təmin etməliyik. Regionlarda kiçik və orta biznesi inkişaf etdirsək bu həm müxtəlif yönümlü xidmətlərin çeşidlərini artırmağa imkan verər, həm də rəqabət mühitini formalaşdıracaq. Xüsusilə büdcəli yerləşmə yerləri, yerli turizm məhsullarının yaradıb təkid edə bilən kiçik turizm agentlikləri, hoteller, motellər, hostellər, kənd evləri, ferma evlərinin sayının artması ilə rəqabət mühiti yaradaraq münasib qiymətlərə gəlib çıxa bilərik”.
S.Dübəndi vurğulayıb ki, iri yay-qış turizm mərkəzlərinin ərazilərində kiçik və mikro bizneslər yoxdur: “O ərazilərin ətrafında daha aşağı qiymətli müəssisələr yaradılmalıdır. Bununla əlçatanlığı təmin etməliyik. Mən əgər uşağımı xizək sürən görmək istəyirəmsə, bu, ürəyimdə arzu olaraq qala bilməz. Vətəndaş kimi bu mənim ürəyimdə arzu olaraq qalmamalıdır”.
Zaur Mirzə
