TƏBİB-in təşkilatçılığı və İcbari Tibbi Sığorta üzrə Dövlət Agentliyinin dəstəyi ilə "TƏBİB-in İxtisas gündəliyi" proqramı çərçivəsində Quba-Xaçmaz TƏB (Quba, Qusar, Xaçmaz, Şabran, Siyəzən) əhalisi üçün 12 dekabr - Universal Tibbi Təminat Gününə həsr edilən “Bir ömür xidmətinizdə” layihəsi icra olunacaq.
Shimal.News xəbər verir ki, 16-19 dekabr tarixlərində Quba Rayon Mərkəzi Xəstəxanasında həyata keçiriləcək layihə çərçivəsində Bakıda yerləşən TƏBİB-in tabeli tibb müəssisələrində fəaliyyət göstərən uzman və ixtisaslı həkimlər tərəfindən (kardioloq, nevroloq, endokrinoloq, nefroloq, uroloq, revmatoloq, psixiatr, uşaq nevroloqu, uşaq endokrinoloqu, uşaq kardioloqu, psixoloq) vətəndaşlara müxtəlif istiqamətlər üzrə profilaktik tibbi müayinələr, əhalinin sağlamlığının qorunması istiqamətində maarifləndirmə işləri, həmçinin regiondakı həkim heyətinin praktiki bilik və bacarıqlarının artırılması nəzərdə tutulub.
Dekabrın 16-da Quba və Siyəzən internat məktəbində uşaqların tibbi müayinəsi, 17-18 dekabr tarixlərində Quba-Xaçmaz TƏB-inə daxil olan rayonların əhalisinin tibbi müayinəsi həyata keçiriləcək.
Dekabrın 19-da isə regional həkimlərin praktiki bilik və bacarıqlarını artırmaq məqsədilə seminarların təşkili, vətəndaşların maarifləndirilməsi üçün tədbirlərin keçirilməsi planlaşdırılıb.
Tibbi müayinələrdən yararlanmaq üçün Quba, Qusar, Xaçmaz, Şabran, Siyəzən rayon mərkəzi xəstəxanalarının Qeydiyyat bölmələrinə müraciət edilməlidir.
