TƏBİB-in təşkilatçılığı və İcbari Tibbi Sığorta üzrə Dövlət Agentliyinin dəstəyi ilə Universal Tibbi Təminat Gününə həsr olunmuş “Bir ömür xidmətinizdə” layihəsi icra edilib.
Shimal.News xəbər verir ki, Quba, Qusar, Xaçmaz, Şabran və Siyəzən rayonlarının vətəndaşları üçün tibbi xidmətlər təşkil olunub.
Layihə çərçivəsində Quba Rayon Mərkəzi Xəstəxanasında bölgə əhalisinə, o cümlədən müxtəlif sosial qruplardan olan 1703 vətəndaşa paytaxtdan dəvət olunmuş uzman və ixtisaslı həkimlər tərəfindən, ümumilikdə, 7 mindən çox tibbi xidmət göstərilib.
Layihə çərçivəsində, həmçinin Quba Rayon Mərkəzi Xəstəxanasında Quba, Xaçmaz, Qusar, Şabran, Siyəzən rayon mərkəzi xəstəxanalarının həkimləri üçün müxtəlif xəstəliklərin diaqnostikası və müalicəsinə multidisiplinar yanaşma mövzusunda seminar keçirilib.
Tədbirdə İcbari Tibbi Sığorta üzrə Dövlət Agentliyinin Marketinq və ictimaiyyətlə əlaqələr departamentinin aparıcı məsləhətçisi Fuad Bayramov "İcbari tibbi sığorta nədir və ondan necə istifadə edə bilərik?" mövzusunda vətandaşlara maarifləndirici təlim keçərək sualları cavablandırıb.
Seminarda Quba Rayon Mərkəzi Xəstəxanasının direktoru Əliyar Sərvərov, TƏBİB-in əməkdaşı Sərxan Ağayev, paytaxtda yerləşən tibb müəssisələrində fəaliyyət göstərən müxtəlif ixtisaslı həkim-mütəxəssislərin və TƏBİB-in Ekspertlər Qrupunun üzvləri çıxışlarında layihənin əhəmiyyətindən danışıblar.
Sonda layihədə uğurla iştirak edən həkim-mütəxəssislər TƏBİB-in İcraçı direktoru Vüqar Qurbanovun adından təşəkkürnamə ilə təltif ediliblər.
