Çıraqqala-Şabran Dövlət Tarix-Mədəniyyət qoruğunun ərazisinə daxil olan Şəhərgah yaşayış məskənində aparılan arxeoloji qazıntı işləri zamanı yeni faktlar aşkarlanıb.
Bu barədə Shimal.News -a Azərbaycan Milli Elmlər Akademiyasının Arxeologiya və Etnoqrafiya İnstitutunun arxeoloji ekspedisiyasının rəhbəri Müzəffər Hüseynov məlumat verib.
Onun sözlərinə görə, indiyədək şəhərin erkən orta əsrlər dövrünə aid olduğu güman edilirdi. Lakin bu dəfəki qazıntılar zamanı ərazidən tapılan çay daşları ilə hökülmüş divar qalıqları və saxsı qablar buranın daha qədim dövrə-təxminən erkən tunc dövrünə aid olduğunu müəyyən edib.
Müzəffər Hüseynov vurğulayıb ki, aşkarlanan yeni faktlar böyük tarixi nəticədir.
Məlumat üçün bildirək ki, “Çıraqqala-Şabran” Qoruğu 7 tarixi abidəni özündə birləşdirir. Onlardan 3-ü dünya əhəmiyyətlidir. Dünya əhəmiyyətli abidələrdən ikisi memarlıq, biri isə arxeoloji abidədir.
