İsmayıllı şəhərinin Cavanşir küçəsində yerləşən bazarda Qida Təhlükəsizliyi Agentliyinin (AQTA) əməkdaşları tərəfindən planlı yoxlama keçirilib. Bu barədə ShimalNews 19 aprel tarixində məlumat verir.
“Şahdağ” firmasına məxsus bazarda fəaliyyət göstərən ticarət obyektlərinin qida məhsullarının saxlanması və satışı üzrə tələblərə uyğun müvafiq avadanlıqlarla təmin edilmədiyi, ət satışı üçün bölmələrin təşkil olunmadığı, xüsusi risk qrupuna aid məhsulların temperatur rejiminə əməl olunmadığı, mal qonşuluğu prinsipinin pozulduğu, işçilərin ilkin və dövri tibbi müayinədən keçmədiyi və xüsusi geyimlə təmin edilmədiyi, qida ilə təmasda olan səthlərin asan təmizlənə və dezinfeksiya edilə bilən materialdan təşkil edilmədiyi və digər nöqsanlar müəyyən olunub.
Nöqsanlarla bağlı qanunvericiliyə uyğun olaraq, müəssisə rəhbəri barəsində inzibati protokol tərtib olunub, bazarda süd məhsullarının satışı sahəsinin fəaliyyəti məhdudlaşdırılıb.
