Almaniyada yetişən azərbaycanlı gənc futbolçu Raul Süleymanov Azərbaycan milli komandalarının diqqət mərkəzinə düşüb.
Futbolinfo.az-ın məlumatına görə, AFFA-nın Skautlar şöbəsi ölkə xaricində çıxış edən gənc futbolçuların axtarışını aktiv şəkildə davam etdirir. Aparılan müşahidələr nəticəsində Almaniyada çıxış edən bir neçə perspektivli oyunçu müəyyənləşdirilib.
Onlardan biri də Almaniyanın Hertha BSC klubunun U-19 komandasının yarımmüdafiəçisi Raul Süleymanovdur.
Əslən Şəkidən olan 16 yaşlı pleymeyker 12 yaşında Berlin təmsilçisinin akademiyasına qəbul olunub və hazırda klubun gənclər komandasında çıxış edir. Onun Almaniyada göstərdiyi inkişaf Azərbaycan skautlarının da diqqətini cəlb edib.
Bildirilir ki, Süleymanovun Azərbaycanın aşağı yaş qruplarından ibarət milli komandalarından birinə dəvət olunması nəzərdə tutulur. Gənc futbolçu özü də doğma vətəninin yığmasında oynamağa müsbət yanaşır.
Bu səbəbdən AFFA-nın onun milliyə cəlb olunması prosesində ciddi çətinliklə üzləşməyəcəyi gözlənilir.
