Azərbaycan millisinin üzvü Eşqin Əhmədov Andorra ilə yoldaşlıq oyununda (3:1) əsas yığmada debüt edib. 21 yaşlı futbolçu ilk matçında qol vurmağı da bacarıb. Onun sabiq məşqçisi Famil Xəlilov gənc futbolçunun əsas üstünlüklərindən danışıb.
Eşqin 2016-cı ildən Qəbələ Futbol Akademiyasında məşq edib. Əslən Tovuzdan olan futbolçunun akademiyadakı məşqçisi, hazırda U-16 millisinin baş məşqçisi Famil Xəlilov onun haqqında danışıb.
"Eşqin fiziki göstəricilərinə görə seçilən futbolçudur. Boyca kiçik olsa da, dözümlülüyü və sürəti yüksək səviyyədədir. Texniki bacarıqları da ona müasir cinah müdafiəçisinin əsas xüsusiyyətlərini özündə birləşdirməyə imkan verir. O, nizam-intizamlı, məsuliyyətli və məşqlərə ciddi yanaşan futbolçudur.
Onun cəsarətli və mübariz xarakterini xüsusi qeyd etmək istərdim. Eşqin həm məşqlərdə, həm də oyunlarda yüksək motivasiya ilə çalışır. Pozitiv enerjisi ilə ətrafındakılara müsbət təsir göstərir. Komanda yoldaşları və məşqçilər tərəfindən sevilir. Düşünürəm ki, bu xüsusiyyətlər onun inkişafında mühüm rol oynayır", – deyə Famil Xəlilov bildirib.
Qeyd edək ki, millinin baş məşqçisi Ayxan Abbasov da Andorra ilə oyundan sonra Eşqin Əhmədovun çıxışını müsbət qiymətləndirib. O, futbolçunun inkişafında Qəbələ klubunun rolunu vurğulayıb və ona əsas heyətdə mütəmadi oynamaq imkanı yaradan klub rəhbərliyinə təşəkkür edib. Mənbə: İdman.biz