Qaxda mülkiyyət hüquqlarını pozan şəxsə cinayət işi açılıb.
İlisu kənd sakini 53 yaşlı Cavanşir İbrahimov (şərti adla) "Ulu Körpü"nün ətrafında Soltan Quliyevə (şərti adla) məxsus 5 kvadratmetr, bələdiyyəyə məxsus 77 kvadratmetr ərazini qanunsuz zəbt edib.
Belə ki, Cavanşir İbrahimov həmin ərazinin ətrafını hasara alıb. Qeyd olunur ki, Soltana məxsus ərazi sahibkarlıq, bələdiyyəyə məxsus ərazi isə təsərrüfat təyinatlı olub. Faktla bağlı cinayət işi başlanıb və C. İbrahimov məsuliyyətə cəlb olunub.
Təqsirləndirilən şəxs ifadəsində bildirib ki, 4-5 ildir bələdiyyəyə məxsus ərazini icarə əsasında istifadə edir. Lakin bu il icarə müqaviləsi bağlanmayıb. Torpağı hasara almaqda məqsədi yay mövsümündə turistlərin, tanımadığı şəxslərin istifadə etdiyi əraziyə daxil olmasının qarşısını almaqdır. İstintaq başlayandan sonra isə həmin hasarları da söküb.
Məhkəmənin qərarı ilə Cavanşir İbrahimov 4 il müddətinə azadlığın məhdudlaşdırılması cəzasına məhkum edilib. O, gecə saat 23:00-dan, səhər saat 7-dək yaşadığı evdən, cəza müddətində isə Qax rayonundan kənara çıxa bilməz.
Mənbə: Lent.аz
