Quba şəhərində 48 yaşlı kişi həmyerlisinə xəsarət yetirməkdə ittiham olunub.
1978-ci il təvəllüdlü Ehtiram küçədə həmyerlisi Muradla mübahisə edib. Mübahisə zamanı o, Muradın üz nahiyəsinə yumruqla vuraraq xəsarət yetirib. Zərərçəkmişin sözlərinə görə, zərbə nəticəsində burnu sınıb.
Məhkəmədə Ehtiram bildirib ki, 2009-cu ildə Rəna ilə ailə qurub və onların iki övladı var. Onun sözlərinə görə, 2026-cı ilin əvvəlində münasibətləri pozulub və həyat yoldaşı atasının evinə köçüb.
Ehtiram keçmiş arvadının başqa şəxslə münasibətdə olduğundan şübhələndiyini, daha sonra isə Muradla münasibəti olduğunu eşitdiyini deyib. O, Muradı Rənanın atasının evindən çıxarkən gördüyünü və bununla bağlı görüntülərin olduğunu bildirib.
Murad isə həmin qadınla heç bir münasibətinin olmadığını deyib. Onun sözlərinə görə, həmin gün Rənanın atasının evinin yaxınlığına başqa məsələ ilə bağlı gedib və Ehtiram heç bir sorğu-sual etmədən ona yumruqla zərbə endirib.
Təqsirləndirilən şəxs Cinayət Məcəlləsinin 128-ci maddəsi ilə təqsirli bilinib və əməlindən peşman olduğunu bildirib.
Quba Rayon Məhkəməsinin hökmü ilə ona aylıq qazancından dövlət nəfinə 10 faiz tutulmaqla 10 ay müddətinə islah işləri cəzası verilib.
( Qeyd edək ki, adlar şərtidir. )
Mənbə: Demokrat.аz
