Quba rayonunun Üçgün kəndində sakinlər ayıların yaşayış məntəqəsinə daxil olaraq təsərrüfatlara ziyan vurmasından narahatdırlar.
Məsələ ilə bağlı Shimal.News-a narahatlığını dilə gətirən kənd sakininin sözlərinə görə, ayı onun həyətinə daxil olaraq ağaclardakı bütün fındıqları yeyib, bir sıra fındıq ağaclarını isə sındırıb. Sakin bildirir ki, əvvəlki illərdə fındıqdan qış mövsümündə təxminən 900-1300 manat gəlir əldə edirdi. Bu il isə ayının vurduğu zərər nəticəsində məhsuldan məhrum olub.
Sakin həmçinin qeyd edir ki, ayı onun təsərrüfatına da ziyan vurub, inək və qoyunlarına hücum edib. O qeyd edib ki, ayılar xüsusilə axşam saatlarında kəndə yaxınlaşaraq həyətlərə daxil olurlar.
"Bu hadisə ailəmiz üçün ciddi narahatlıq yaradır. Ayı hər an həyətə girə və bizə hücum edə bilər. Ayıların hücumların qarşısını almaq və özümüzü, təsərrüfatımızı qorumaq üçün heç nə edə bilmirik, çarəsiz vəziyyətdə qalmışıq", - deyə sakin bildirib.
Eyni zamanda, vətəndaşlar Ekologiya və Təbii Sərvətlər Nazirliyinin qaynar xəttinə müraciət ediblər. Müraciətdən sonra aidiyyəti əməkdaşlar onun və digər kənd sakinlərinin iştirakı ilə həyətyanı bağ sahəsinə və ayının ziyan vurduğu ərazilərə baxış keçiriblər.
Kənd sakinləri aidiyyəti qurumların məsələyə müdaxilə etməsini və ayıların yaşayış məntəqəsinə daxil olmasının qarşısının alınması üçün tədbirlər görülməsini istəyirlər.
