Balakən rayonunda dörd nəfərin ölümü ilə nəticələnən zəncirvari yol qəzasının bəzi təfərrüatları məlum olub.
Məlumata görə, "Hyundai" markalı avtomobili idarə edən 1997-ci il təvəllüdlü Məryəm Hoorsova Balakəndəki bank şöbəsində məsul əməkdaş kimi çalışıb.
Məryəm işə gedərkən Katex kəndində yol kənarında marşrut avtobusu gözləyən həmkəndlisi, 1965-ci il təvəllüdlü Şərif Soltanovu görüb. O, avtomobili saxlayaraq fiziki qüsurlu Şərifi də sərnişin qismində maşına mindirib.
Bildirilir ki, Məryəm avtomobili cəmi iki ay əvvəl alıb. Bu, onun ilk maşını olub.
Hadisə zamanı o, yolda "TIR" markalı yük avtomobilini ötmək istəyib. Bu zaman qarşı hərəkət zolağına çıxaraq "Toyota" markalı maşınla toqquşub. Daha sonra "KIA" markalı nəqliyyat vasitəsi də qəza törədən avtomobillərə çırpılıb.
Qəza nəticəsində "Hyundai"ın sürücüsü Məryəm Hoorsova, "Toyota"da olan sərnişinlər – 1974-cü il təvəllüdlü Pərvanə Məmmədova və 1999-cu il təvəllüdlü Rəşad Mütəllibov hadisə yerində ölüblər.
"Toyota"nın sürücüsü, 1975-ci il təvəllüdlü Yaşar Mütəllibov və Şərif Soltanov xəsarət alıblar.
Yaşar Mütəllibov daha sonra yerləşdirildiyi xəstəxanada vəfat edib.
Məlumata görə, Yaşar Mütəllibov və Pərvanə Məmmədova ər-arvad olublar. Rəşad Mütəllibov isə onların oğlu olub.
Ailə Balakəndən Goranboya qohumlarına dəvətnamə aparırmış.
Qəzada həyatını itirən Rəşad Mütəllibovun avqustun 28-də toyunun olacağı bildirilir.
Mənbə: Oxu.аz
