Balakən rayonunda Dəliçay çayı ərazisində su qanunvericiliyinin tələblərinin pozulması halı aşkarlanıb.
Daxili İşlər Nazirliyindən bildirilib ki, Su Nəqliyyatında Polis İdarəsi Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən daxil olan müraciət əsasında müvafiq tədbirlər həyata keçirib.
Araşdırma zamanı Dəliçay çayı ərazisində su hövzəsinin tikinti-söküntü tullantıları, məişət tullantıları, bərk və qarışıq süxurlarla qanunsuz doldurulması, akvatoriyaya torpaq və digər materialların tökülməsi, həmçinin sahilboyu mühafizə zolağında torpaq-qazıntı işlərinin aparılması müəyyən edilib.
Həmçinin ərazidə icazəsiz qazıntı işlərinin aparılması nəticəsində yerin relyefinin dəyişdirilməsi və hidroloji rejimin pozulmasına səbəb olan hallar aşkarlanıb.
Faktla bağlı Cinayət Məcəlləsinin müvafiq maddəsi ilə cinayət işi başlanılıb. Hazırda faktın hüquqi qiymətləndirilməsi məqsədilə zəruri istintaq tədbirləri davam etdirilir.
