Xaçmazda baş vermiş qəzada dünyasını dəyişən şəxsin yaxınları həkimləri ittiham edirlər. Bu barədə ShimalNews 26 avqust tarixində Qafqazinfo-ya istinadən xəbər verir.
Yol-nəqliyyat hadisəsində ağır xəsarət alan Həzi Əhmədov Bakıdakı “Avrasiya” klinikasında vəfat edib. Onun nəşini dəfn etmək üçün Zərdab rayonuna təcili tibbi yardım avtomobili ilə çatdırılması qərarı qəbul edilib. Yaxınları, rayona aparıldıqdan sonra düynasını dəyişən şəxsin nəfəs aldığını, gözlərini açıb onlara baxdığını bildiriblər.
39 yaşlı Əhmədov Bakıdan gələn təcili tibbi yardım maşını ilə Göyçay Rayon Mərkəzi Xəstəxanasına çatdırılıb. Lakin burada onun artıq vəfat etdiyi bildirib.
Xəstəxanada Əhmədovun qohumları həkimlərlə mübahisə ediblər. Onlar paytaxtdan gələn həkimləri mərhumun ölümündə ittiham ediblər. Həzinin yaxınları iddia ediblər ki, tibb işçiləri 3 uşaq atasının qoşulduğu oksigen aparatından tezliklə ayrılmasını tapşırıblar və paytaxta qayıtmaq istəyiblər.
Göyçay Rayon Mərkəzi Xəstəxanasına cəlb edilən polis əməkdaşları qohumları şöbəyə aparıblar. Onlardan biri, 37 yaşlı S.Əhmədov barəsində inzibati protokol tərtib edilib və o, Göyçay Rayon Məhkəməsinin qərarı ilə 200 manat cərimə olunub.
