Zaqatala şəhərinin İstiqlaliyyət küçəsində su xəttinin çəkilişi zamanı qazılan yolun asfalt örtüyü hələ də bərpa edilməyib.
Bu barədə Shimal.News-a küçə sakinləri məlumat veriblər.
Onların sözlərinə görə, vətəndaşlardan birinin evinə su xətti çəkilərkən küçənin bir hissəsi qazılıb. İşlər başa çatdıqdan bir müddət keçməsinə baxmayaraq, qazılan hissə əvvəlki vəziyyətinə qaytarılmayıb.
Nəticədə yay aylarında küçədə toz-torpaq, yağışlı havalarda isə palçıq yaranır. Bu vəziyyət həm sakinlərin, həm də küçədən istifadə edənlərin narazılığına səbəb olur.
Sakinlər bildirirlər ki, məsələ ilə bağlı Zaqatala rayon su idarəsinə müraciət ediblər, lakin problem hələ də həllini tapmayıb.
Vətəndaşlar qazıntının aparıldığı hissənin asfalt örtüyünün bərpa olunmasını və küçənin əvvəlki vəziyyətinə qaytarılmasını istəyirlər.
