Dövlət Sərhəd Xidmətinin hərbi qulluqçusu, Xaçmaz rayonundan olan Aqşin Ramiz oğlu Məhərrəmova ali hərbi rütbəsi verilib.
Shimal.News-un məlumatına görə, Prezident İlham Əliyev bununla bağlı sərəncam imzalayıb.
Aqşin Məhərrəmov general-mayor rütbəsindən general-leytenant rütbəsinə yüksəlib.
Qısa dosye – Aqşin Məhərrəmov
Aqşin Ramiz oğlu Məhərrəmov 14 avqust 1982-ci ildə Xaçmaz rayonunda anadan olub. O, 2000-ci ildən hərbi xidmətdədir. Dövlət Sərhəd Xidmətinin Xüsusi Hava Əməliyyatları Qüvvələrinin Komandanı kimi fəaliyyət göstərib.
Məhərrəmovun hərbi karyerasında 2020-ci il Vətən müharibəsi xüsusi yer tutur. O, Qarabağ istiqamətində keçirilən hərbi əməliyyatlarda iştirak edib. Mənbələrdə onun Cəbrayıl və Zəngilanın azad edilməsi, eləcə də digər əməliyyatlarla bağlı döyüş fəaliyyətində iştirakı qeyd olunur.
2020-ci ildə Aqşin Məhərrəmov "Zəfər" ordeni ilə təltif edilən generallar sırasında yer alıb. Həmin vaxt onun hərbi rütbəsi general-mayor kimi göstərilib.
2021-ci ildə Məhərrəmov "Qubadlının azad olunmasına görə" medalı ilə təltif edilib.
2023-cü ildə isə ona 2-ci dərəcəli "Rəşadət" ordeni təqdim edilib.
