Xaçmaz şəhərində vaxtilə ləğv olunan avtomobil yolu bərpa ediləcək.
Shimal.News-un əldə etdiyi məlumata görə, şəhər ərazisində yerləşən Şəxsiyyətlər parkının böyük bir hissəsi yaxın günlərdə söküləcək. Hazırda çəpərləmə və söküntü işləri aparılır.
Bildirilib ki, əvvəllər burada avtomobil yolu olub. Onun bərpa edilməsilə bağlı vətəndaşlar müvafiq qurumlara çoxsaylı müraciətlər ünvanlayıblar.
Hazırda Heydər Əliyev prospekti ilə hərəkət edən avtomobillərin bir hissəsi N.Nərimanov küçəsinə dönür, oradan M.Ə.Rəsulzadə küçəsinə, daha sonra isə G.H.Rəsulbəyov küçəsinə çıxır, nəhayət, yenidən H.Əliyev prospektinə keçərək, yollarına davam edirlər. Beləliklə, sürücülər 3 küçədən keçərək yollarını uzadır, əlavə vaxt itkisi yaşayırdılar.
Adıçəkilən ərazidə yol bərpa olunandan sonra Heydər Əliyev prospektilə birbaşa hərəkət etmək mümkün olacaq. Bununla gediş-gəliş asanlaşacaq.
