Xaçmaz şəhərində yol hərəkətinin təşkili ilə bağlı sürücülərin narazılığına səbəb olan vəziyyət yaranıb.
Shimal.News-a müraciət edən vətəndaşların sözlərinə görə, N.Nərimanov küçəsində (M.Ə.Rəsulzadə küçəsi ilə kəsişmədə) iki zolaq bir zolağa yönləndirilir. Lakin həmin istiqamətdə hərəkət davam edir və sürücünün manevrin hansı qaydada aparılmalı olduğunu dəqiq müəyyənləşdirməsi çətinləşir.
Sürücülər bildirirlər ki, vəziyyəti daha da mürəkkəbləşdirən məqam "Bir istiqamətli hərəkət yolunun sonu" nişanının yalnız təxminən 10 gün əvvəl quraşdırılmasıdır.
Məsələyə görə narazılığını bildirən sürücülərdən biri qeyd edib ki, ötən ay Sumqayıtdan Xaçmaza qonaq gəlib və EQ37233161 nömrəli protokolla cərimələnib. Bildirilib ki, protokol İXM-in 327.2-ci maddəsi üzrə tərtib olunub və 100 manat ilə yanaşı 3 cərimə balı nəzərdə tutur.
Sürücünün sözlərinə görə, protokolun tərtib edildiyi vaxt həmin ərazidə hazırda quraşdırılan nişan olmayıb. O, həmin tarixdə ərazinin vəziyyətini əks etdirən video görüntüləri də çəkib.
Vətəndaş hesab edir ki, yol nişanlarının sonradan quraşdırılması həmin tarixdə onun hərəkətinin qiymətləndirilməsi zamanı nəzərə alınmalıdır.
Sürücülər aidiyyəti qurumlardan yolun hərəkət sxeminin daha aydın təşkil edilməsini, nişan və xətlənmənin sürücülər üçün anlaşılmazlıq yaratmayacaq formada tətbiq olunmasını, həmçinin cərimələr zamanı pozuntunun hansı əsasla müəyyən edildiyinin aydın göstərilməsini istəyirlər.
