Xaçmaz rayonunun bir neçə kəndində gecə saatlarında divar, hasar, qapı və işıq dirəklərinə naməlum şəxslər tərəfindən müxtəlif yazılar həkk edilib.
Son günlər Qaradağlı, Hülövlü və Çarxı kəndlərində sakinlər bu halla qarşılaşıblar. Yazıların məzmununun bəlli olmaması və bəzi hallarda sosial şəbəkə ünvanlarının qeyd edilməsi sakinlər arasında narahatlıq yaradıb. Onların narkotik vasitələrin təbliğatı ilə əlaqəli ola biləcəyi ehtimal edilir.
Hülövlü kəndi üzrə nümayəndə Rəhman İsrafilov bildirib ki, məsələ ilə bağlı əraziyə baxış keçirilib, yazıların fotoşəkilləri araşdırılması üçün hüquq-mühafizə və aidiyyəti qurumlara təqdim olunub. Yazıların yaxın vaxtlarda silinəcəyi bildirilib.
DİN-in Quba regional qrupundan isə bildirilib ki, məsələ ərazi polis orqanının nəzarətindədir və araşdırma aparılır.
Mənbə: AZƏRTAC
