Bu gün Vətən müharibəsi şəhidləri olan Röyal Qurbanov və Şahin İskəndərovun doğum günüdür.
Röyal Ziyad oğlu Qurbanov 2001-ci il avqustun 21-də Siyəzən rayonunun Beşdam kəndində anadan olub. Beşdam kənd orta məktəbində təhsil alıb. 2019-cu ilin oktyabrında müddətli həqiqi hərbi xidmətə çağırılıb və Xüsusi Təyinatlı Qüvvələrin kəşfiyyat bölüyündə xidmət edib.
O, 2020-ci il sentyabrın 27-də başlayan Vətən müharibəsində Suqovuşanın azad olunması uğrunda gedən döyüşlərdə iştirak edib. Röyal Qurbanov oktyabrın 5-də Cəbrayıl istiqamətində gedən döyüşlərdə şəhid olub. Siyəzən rayonunun Beşdam kəndində dəfn edilib.
Şəhid Röyal Qurbanov ölümündən sonra "Vətən uğrunda", "Cəsur döyüşçü", "Cəbrayılın azad olunmasına görə" və "Kəlbəcərin azad olunmasına görə" medalları ilə təltif edilib.
Şahin Ziyad oğlu İskəndərov isə 2001-ci il avqustun 21-də Zaqatala rayonunun Qandax kəndində anadan olub. 2008-2019-cu illərdə V.Saatov adına Qandax kənd tam orta məktəbində təhsil alıb.
2019-cu ildə müddətli həqiqi hərbi xidmətə çağırılan Şahin İskəndərov Vətən müharibəsinə qədər Xüsusi Təyinatlı Qüvvələrin Cəlilabad rayonunda yerləşən "N" saylı hərbi hissəsində xidmət edib.
O, Vətən müharibəsi zamanı Füzuli, Xocavənd və Cəbrayıl rayonlarının azadlığı uğrunda gedən döyüşlərdə iştirak edib. Oktyabrın 11-də Cəbrayıl istiqamətində gedən döyüşlərdə snayper atəşi nəticəsində şəhid olub. Şahin İskəndərov Zaqatala rayonunun Qandax kəndində torpağa tapşırılıb.
Şahin İskəndərov ölümündən sonra "Vətən uğrunda", "Cəsur döyüşçü", "Xocavəndin azad olunmasına görə", "Şuşanın azad olunmasına görə", "Azərbaycan Bayrağı" və "Kəlbəcərin azad olunmasına görə" medalları ilə təltif edilib.
