Xudat şəhər 4 nömrəli məktəb-liseylə bağlı valideynlər arasında narazılıq yaranıb.
Shimal.News-a danışan valideynlərin sözlərinə görə, yeni tədris ilindən etibarən məktəbin yalnız IX sinfə qədər fəaliyyət göstərəcəyi və X-XI sinif şagirdlərinin Xudat şəhər N.Nərimanov adına 2 nömrəli tam orta məktəbə göndəriləcəyi bildirilib.
Valideynlər isə bu qərara etiraz edirlər. Onlar məktəbin əvvəlki qaydada fəaliyyətini davam etdirməsini və övladlarının təhsillərini yaşadıqları əraziyə yaxın məktəbdə davam etdirməsini istəyirlər.
Valideynlərdən biri bildirib ki, övladlarının başqa məktəbə göndərilməsi ailələr üçün əlavə çətinlik yaradacaq:
"Uşaqlarımız 10-cu sinfə keçir. Qoymurlar ki, öz məktəblərində təhsillərinə davam etsinlər. Deyirlər ki, 10-11-ci sinifləri 2 nömrəli məktəbə göndərəcəklər. Mənim iki qızım var. Biri 6-cı, digəri isə 10-cu sinfə keçir. Özüm də işləyirəm. Əvvəl rahat idim ki, məktəb evimizin yaxınlığındadır, bacılar eyni yolla gedib-gəlirlər və bir yerdə olurlar. Hər hansı hadisə baş verərsə, bir-birlərinə dəstək ola bilərlər.
Məktəbi təmir etdikləri zaman da uşaqlarımızı başqa məktəbə göndərmişdilər və bununla bağlı xeyli əziyyət çəkdik. İndi isə təmir olunmuş məktəb olduğu halda, uşaqlarımızı yenidən evlərimizdən uzaqda yerləşən məktəbə göndərmək istəyirlər. Valideynlərin heç biri bununla razı deyil".
Valideynlər məsələnin aidiyyəti qurumlar tərəfindən nəzərdən keçirilməsini və şagirdlərin öz məktəblərində təhsillərini davam etdirməsinə şərait yaradılmasını istəyirlər.
Məsələ ilə bağlı Quba-Xaçmaz Regional Təhsil İdarəsinə sorğu ünvanlanıb.
