Bu gün igid şəhidlərimiz - Təbriz Əliyev və Qədim Xəlilovun doğum günüdür.
Təbriz Tofiq oğlu Əliyev 2001-ci il avqustun 20-də Qax şəhərində anadan olub. 2019-cu ildən Azərbaycan Silahlı Qüvvələrinin sıralarında müddətli həqiqi hərbi xidmət keçib.
O, 2020-ci il sentyabrın 27-də başlayan Vətən müharibəsi zamanı Ağdərə istiqamətində gedən döyüşlərdə iştirak edib. Oktyabrın 19-da həmin istiqamətdə gedən döyüşlərdə şəhid olub. Təbriz Əliyev Qax şəhərində dəfn edilib.
Şəhid Təbriz Əliyev ölümündən sonra "Vətən uğrunda", "İgidliyə görə" və "Suqovuşanın azad olunmasına görə" medalları, həmçinin 3-cü dərəcəli "Vətənə xidmətə görə" ordeni ilə təltif edilib.
Qədim İlqar oğlu Xəlilov isə 2002-ci il martın 28-də İsmayıllı rayonunun Hacıhətəmli kəndində anadan olub. Hacıhətmli kənd orta məktəbini bitirib.
Azərbaycan Ordusunun əsgəri Qədim Xəlilov 2022-ci il sentyabrın 14-də Ermənistan silahlı qüvvələrinin Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində törətdiyi genişmiqyaslı təxribatın qarşısının alınması zamanı şəhid olub.
O, İsmayıllı rayonunun Hacıhətəmli kənd qəbiristanlığında dəfn edilib.
Qədim Xəlilov ölümündən sonra "Vətən uğrunda" medalı ilə təltif olunub.
Qeyd edək ki, Qədim Xəlilovun əmisi də Birinci Qarabağ müharibəsində şəhid olub.
