Fövqəladə Hallar Nazirliyinin aidiyyəti qurumları tərəfindən Şabran və Şəkidə əhalinin fövqəladə hallarla bağlı maarifləndirilməsi məqsədilə tədbirlər keçirilib.
Shimal.News-un məlumatına görə, FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssislərinin iştirakı ilə Şimal Regional Mərkəzi tərəfindən Şabran rayonunun Ağalıq kənd inzibati ərazi dairəsi üzrə nümayəndəliyində maarifləndirmə tədbiri təşkil olunub.
Bununla yanaşı, Şimal-Qərb Regional Mərkəzi tərəfindən Şəki-Zaqatala Regional Gənclər və İdman İdarəsində analoji görüş keçirilib.
Tədbirlərin əsas məqsədi təbii və texnogen xarakterli fövqəladə hadisələr zamanı düzgün davranış qaydaları barədə vətəndaşlara zəruri biliklərin çatdırılması olub.
Görüşlərdə fövqəladə halların təsnifatı və ölkəmiz üçün xarakterik olan hadisələr barədə məlumat verilib.
Yanğın və zəlzələ zamanı davranış qaydaları ətraflı izah edilib.
Həmçinin FHN-in "112" qaynar telefon xəttinin təyinatı açıqlanıb. İlkin yanğınsöndürmə vasitələrindən istifadə qaydaları isə əyani şəkildə nümayiş etdirilib.
İnteraktiv formada keçirilən tədbirlər zamanı iştirakçıların sualları cavablandırılıb.
