Şəki şəhərində məişət tullantılarının toplanması və daşınması ilə bağlı problem sakinlərin narazılığına səbəb olub.
Shimal.News-a müraciət edən sakinlərin sözlərinə görə, şəhərin bir çox ərazisində zibil qablarının olmaması antisanitar vəziyyətin yaranmasına şərait yaradır.
Bildirilib ki, çoxmərtəbəli binaların sakinləri üçün tullantıların toplanması məqsədilə müəyyən yerlər ayrılsa da, şəhərin digər hissələrində vəziyyət fərqlidir. Zibil qablarına əsasən mağazaların qarşısında rast gəlmək mümkündür.
Sakinlərin sözlərinə görə, bəzi ərazilərdə tullantıların daşınması üçün hər ailədən aylıq 2 manat pul toplanır. Bunun qarşılığında zibil maşını həftədə bir dəfə əraziyə gəlir.
Digər sakinlər isə hər gün səhər saat 09:00-dək məişət tullantılarını əsas yolun kənarına çıxarıb qoyurlar. Vaxtında çıxarılmayan tullantıların isə növbəti günə qədər ərazidə qaldığı bildirilir.
Sakinlər hesab edirlər ki, tullantıların bu cür toplanması həm şəhərin görünüşünə, həm də sanitariya vəziyyətinə mənfi təsir göstərir. Onlar zibil qablarının sayının artırılmasını və tullantıların daşınması sisteminin daha səmərəli təşkil olunmasını istəyirlər.
