Şəkidə sahibsiz itlərin çoxalması sakinlər arasında ciddi narahatlığa səbəb olub.
Sakinlərin sözlərinə görə, xüsusilə səhər saatlarında şəhərin bazar ərazisində 10-15 sahibsiz itin bir yerdə hərəkət etməsi adi mənzərəyə çevrilib. Bildirilir ki, sürü halında gəzən itlər bəzən tək hərəkət edən insanların üzərinə hücum edir.
Vətəndaşlar bildirir ki, son günlərdə bir sakinin burnunu it dişləyib. Həmçinin Şəkidə Niderland vətəndaşına sahibsiz itlər hücum edib və o, ağır xəsarət alıb.
Sakinlər hesab edirlər ki, xüsusilə insanların sıx olduğu ərazilərdə sahibsiz itlərlə bağlı tədbirlər gücləndirilməlidir.
Məsələ ilə bağlı Şəki Şəhər İcra Hakimiyyətindən bildirilib ki, sahibsiz itlər problemi narahatlıq doğuran məsələlərdəndir.
Qurumun məlumatına görə, 2026-cı ildə sahibsiz itlərin çoxalması və insanlara hücum etməsi ilə bağlı 19 müraciət daxil olub.
Bildirilib ki, sahibsiz itlərin xüsusi müəssisələr tərəfindən götürülərək sığınacaqlarda yerləşdirilməsi vacibdir. Şəki şəhərində sığınacaq yaradılması ilə bağlı təkliflər hazırlanıb, aidiyyəti dövlət qurumları ilə məsləhətləşmələr aparılıb, qeyri-hökumət təşkilatlarına və sahibkarlara müraciətlər edilib.
Hazırda heyvansevərlərin də cəlb olunması ilə Şəkidə sahibsiz itlər üçün sığınacağın yaradılması və digər zəruri tədbirlərin görülməsi istiqamətində işlər aparılır.
Mənbə: Modern.az
