Şəkinin Daşüz kəndinə gedən yolun vəziyyəti sakinlərin ciddi narazılığına səbəb olub.
Məlumata görə, təxminən 500 sakinin yaşadığı kənd magistral yoldan 6 kilometr məsafədə yerləşir.
Yolun başlanğıc və kəndə giriş hissəsi asfaltlanıb. Lakin dağ yamaclarından keçən hissədə uzun illərdir təmir aparılmadığından iri çuxurlar və palçıqlı gölməçələr yaranıb.
Dik yoxuşlar və dolaylı dağ yolları xüsusilə yağışlı havalarda avtomobillərin hərəkətini çətinləşdirir.
Sakinlər bildirirlər ki, yolun təxminən 30 ildən çoxdur təmir olunmayan hissələri var. Onların sözlərinə görə, yayda toz, yağışlı və qış aylarında isə palçıq ciddi problem yaradır.
Kənddə ərzaq mağazasının olmadığını deyən sakinlər gündəlik ehtiyaclarını qarşılamaq üçün rayon mərkəzinə getməli olurlar. Bu isə yararsız yol səbəbindən əlavə çətinlik yaradır.
Azərbaycan Avtomobil Yolları Dövlət Agentliyindən bildirilib ki, Daşüz kəndinə gedən yoldakı vəziyyət qurumun diqqətindədir.
Qeyd olunub ki, yolun əsaslı şəkildə yenidən qurulması ilə bağlı təkliflər hazırlanaraq aidiyyəti üzrə təqdim edilib.
Layihənin növbəti dövlət investisiya proqramına daxil edilməsi nəzərdə tutulur. Maliyyələşmə məsələsi həll olunduqdan sonra yolda əsaslı yenidənqurma işlərinin aparılması təmin ediləcək.
Mənbə: Xezerxeber.az
