Şəki şəhərinin 119-cu kvartalında yerləşən Yeni Yaşayış Massivində 20-dən çox ailənin qazsız yaşadığı bildirilir.
Shimal.News-a müraciət edən sakinlərin sözlərinə görə, ərazidə 20 ilə yaxındır təbii qaz yoxdur. Problemlə bağlı indiyədək bir neçə dəfə mediada məlumat yayılsa da, onların sözlərinə görə, bu məsələ nəticəsiz qalıb.
Sakinlər bildirirlər ki, Şəki-Zaqatala Regional Qaz İstismarı İdarəsinə və Şəki Şəhər İcra Hakimiyyətinə dəfələrlə müraciət ediblər. Cavab isə "gözləyin" olub.
"Deyirlər səbr edin, olacaq. 20 ildir səbr edirik, artıq səbrimiz bitib", – sakinlərdən biri bildirib.
Qazın olmaması xüsusilə qış aylarında ciddi çətinlik yaradır. Sakinlər odun almaqda çətinlik çəkdiklərini, ərazidə azyaşlı uşaqların və körpələrin də yaşadığını deyirlər.
Maraqlıdır ki, 119-cu kvartalla bağlı qazlaşdırma məsələsi əvvəllər də gündəmə gəlib. 2022-ci ildə 119A kvartal sakininin qazlaşdırma ilə bağlı müraciəti qeydə alınıb. 2024-cü ildə isə 118 və 119-cu kvartalların qazlaşdırılması istiqamətində əraziyə materialların gətirildiyi və işlərə başlanacağı açıqlanıb.
Sakinlər bildirirlər ki, bir neçə xəbər və müraciətdən sonra da problem həllini tapmayıb. Onlar aidiyyəti qurumlardan artıq konkret tarix və əməli addımlar gözləyirlər.
