Şabran rayonunun Gəndab qəsəbəsində Şükürovlar ailəsi beş ildir ağır və təhlükəli şəraitdə yaşayır.
Məlumata görə, ailənin evi 4 avqust 2021-ci ildə baş verən yanğın nəticəsində tamamilə yararsız vəziyyətə düşüb.
Ramilə Şükürovanın sözlərinə görə, yanğın zamanı evdən heç nə çıxara bilməyib. Yalnız 4 yaşlı qızı Nəzrini xilas edə bilib.
Daha sonra kənd sakinlərinin köməyi ilə ailə üçün yeni evin tikintisinə başlanılıb. Lakin maddi imkan olmadığı üçün tikinti yarımçıq qalıb.
Hazırda Şükürovlar sovet dövründən qalma inzibati binanın bir otağında yaşayırlar. Binanın damı qəzalı olduğuna görə, yağış sularının içəri axdığı bildirilir.
Ailə üzvlərinin sözlərinə görə, otaqdan tez-tez ilanlar da çıxır. Bu isə xüsusilə uşaqların təhlükəsizliyi ilə bağlı narahatlıq yaradır.
Ailə başçısı Bəhmən Şükürov günəmuzd işləyərək ailəsini dolandırır. İş olmayanda isə sumağ yığıb satır.
Şükürovlar ailəsinin əsas arzusu yarımçıq qalan evlərinin tamamlanması və beş ildən sonra öz evlərinə qayıtmaqdır.
Məsələ ilə bağlı Şabran Rayon İcra Hakimiyyətindən bildirilib ki, qurumun ailəyə ev tikmək üçün kifayət qədər maliyyə imkanı yoxdur. Bununla belə, ailəyə imkan daxilində kömək göstəriləcəyi qeyd olunub.
Mənbə: Bizim.Media
