Şəkidə keçirilən "Yerli terruar, qlobal təcrübə" adlı şərab turizmi konfransında Azərbaycan şərabları ilə bağlı maraqlı açıqlama səsləndirilib.
Shimal.News xəbər verir ki, Rusiyanın Azərbaycandakı səfiri Mixail Yevdokimov Şəkidə ilk dəfə olduğunu və şəhərdən böyük təəssürat aldığını bildirib.
Diplomat Azərbaycanın şərablarını da yüksək qiymətləndirib. O qeyd edib ki, 10 ildən artıq Avropada çalışdığı üçün uzun müddət Avropa şərablarını ən yaxşı hesab edib.
"Mən 10 ildən artıq Avropada işləmişəm və həmişə hesab etmişəm ki, Avropa şərabları ən yaxşıdır. Amma indi Azərbaycanda işlədikdən sonra bununla mübahisə edə bilərəm".
Yevdokimov Şəki səfəri barədə də danışıb:
"Etiraf etməliyəm ki, Şəkidə ilk dəfə oluram. Bu dəvəti böyük məmnuniyyətlə qəbul etdim. Şəhər məndə böyük təəssürat yaratdı".
Səfir Azərbaycanda şərab turizminin inkişafının vacibliyini vurğulayıb və Rusiyanın bu istiqamətdə təşəbbüslərə dəstək göstərməyə hazır olduğunu deyib.
Onun sözlərinə görə, rusiyalı turistlərin Azərbaycana, o cümlədən Şəkiyə səfərlərinin artırılması və yerli şərablarla tanış olması üçün əməkdaşlıq imkanları genişdir.
Mənbə: Media.az
