Qusarda təhsil infrastrukturu ilə bağlı yeni layihələr həyata keçirilir. Növbəti illərdə rayonun Yasab, Həzrə, İmamqulukənd, Qaratoba və Kuzunqışlaq kəndlərində məktəb binaları ilə bağlı işlərin görülməsi nəzərdə tutulur.
Shimal.News-un məlumatına görə, 2025-ci ildə Cibir kəndində 264 şagird yerlik yeni tam orta məktəb binası istifadəyə verilib. Hazırda Kuzunqışlaq kəndində yeni məktəb binasının tikintisi davam edir.
Məlumat 2026–2027-ci tədris ili üzrə keçirilən sentyabr konfransında səsləndirilib.
Konfransda Qusar məktəblilərinin yüksək nəticələri də diqqət çəkib. Belə ki, qəbul imtahanlarında rayonun 12 məzunu 600-dən, 38 məzunu isə 500-dən yuxarı bal toplayıb.
Yuxarı Zeyxur kənd tam orta məktəbinin məzunu Emiliya Qayıbova isə buraxılış imtahanında ölkə üzrə maksimum nəticə göstərən 9 şagirddən biri olub.
Fənn olimpiadalarında da Qusar məktəbliləri uğur qazanıblar. 1283 iştirakçıdan 31-i yarımfinala, 5-i isə final mərhələsinə yüksəlib.
