Qusar rayonunun təxminən 2000 sakini olan Yasab kəndində mavi yanacaqla bağlı sıxıntı yaşanır. Bu barədə ShimalNews 30 avqust tarixində Real TV-yə istinadən məlumat verir.
Sakinlərin sözlərinə görə, 30 ildən çoxdur ki, kənddə qazlaşdırılma aparılmır. Lakin qonşu Hil kəndi mavi yanacaqla təmin olunub. Yasab isə rayonun sayca 3-cü ən böyük yaşayış məntəqəsidir.
Hazırda sakinlər yanacaq mənbəyi kimi odundan istifadə edirlər. Onu isə əldə etmək müşkül məsələyə çevrilib. Üstəlik maddi baxımdan sərfəli deyil.
Məsələ ilə bağlı Qusar RİH-dən bildirildi ki, kəndə qazın çəkilməsi üçün bir neçə dəfə “Azəriqaz” İB-yə rəsmi məktub göndərilib.
“Çalışırıq ki, soyuq havalar gəldiyi üçün işlərimiz maksimum intensiv olsun, maksimum nəticələr olsun. O ki qaldı bəhz etdiyiniz kənddən, oranın qazlaşdırılması təbii ki “Azəriqaz”ın hədəflərindən biridir. Sadəcə olaraq bu işlər mərhələli şəkildə görülür. Bu kəndin də qazlaşma prosesi gündəmdədir”, - “Azəriqaz” İB-nin İctimaiyyətlə Əlaqələr Şöbəsinin Müdiri Eldəniz Vəliyev bildirib.
