Qubanın intensiv avtomobil hərəkəti olan küçələrinin birində süni maneə yaradılıb. Bu barədə ShimalNews-a 3 sentyabr tarixində izləyicilər məlumat verib.
Əliqulu Nərimanov küçəsində yolun hərəkət hissəsində kəndir ip çəkilib. Bu hal təxminən 10 gün davam edir.
“Bu nə dərəcədə düzgündür? Çox guman ki, bunu camaat qoyub. Qubanın heç bir küçəsində belə hal yoxdur. H.Əliyev prospekti ilə yuxarı qalxan və Qəçrəşdən gələn bütün avtomobillər məcbur olur ki, kəndirin üstündən keçsin. Bəziləri görmür və sürəti endirməyə çatdırmır”, - deyə sürücülərdən biri bildirib.
Nəqliyyat ekspertləri bu məsələ ilə bağlı fikir bildiriblər.
Yol hərəkəti haqqında qanunun tələblərinə görə, hər hansı bir nişanın, nişanlanma xəttinin quraşdırılması yol hərəkəti təhlükəsizlik komissiyasının qərarı ilə edilə bilər. Maneələrin quraşdırılması mütləq şəkildə dövlət qurumlarının icazəsi ilə həyata keçirilməlidir. Bu çərçivədən qırağa çıxmaq qanuna ziddir.
Eləcə də belə süni maneələr uzaqdan yaxşı görünən, gecə vaxtı işığı əks etdirən səthə malik olmalı, hündürlüyü istənilən növ nəqliyyat vasitəsinin keçə biləcəyi qədər olmalıdır və onların qarşılarında xüsusi xəbərdarlıq nişanı da qoyulmalıdır.
