Qubanın 1800 nəfərə yaxın əhalisi olan kənddə su təminatı ilə çətinlik yaşanır. Bu barədə ShimalNews 30 avqust tarixində Real TV-yə istinadən məlumat verir.
Aşağı Atuc kəndində 2 artezian quyusu var, lakin sakinlər suyu pulnan gətizdirirlər. Buna səbəb quyuların sayının az olmasıdır. Həmçinin bəzi şəxslər ödəniş etmədiklərinə görə, təminatda fasilələr yaranır.
“Bizim çıxış yolumuz odur ki, “Azərsu”dan tələb edək gətirib su sayğaclarını qoysunlar və kart versinlər. Hərə öz kartına məbləğini köçürsün və suyunu istifadə etsin”, - deyə kənd sakini Seymur Səfərəliyev bildirib.
Çətinliklə qarşılaşan əhali vəziyyətin həllini smart tipli sayğacların quraşdırılmasında görür. Məsələ ilə bağlı “Azərsu” ASC-yə müraciət olunub. Qurumdan bildirilib ki, adıçəkilən kənddə onlar tərəfdən xidmət göstərilmir. Ona görə də bu barədə ətraflı açıqlama verilə bilməz.
Quba rayon İH başçısının Aşağı Atuc İnzibati Ərazi Dairəsi üzrə nümayəndəsi Tural Hacıyev isə bildirdi ki, əhalinin içməli su təminatını yaxşılaşdırmaq üçün növbəti ilin mart ayında daha bir artezian quyusunun qazılması nəzərdə tutulub və artıq onun yeri də müəyyənləşdirilib. Həmin quyu da hazır olduqdan sonra isə onun “Azərsu” ASC-nin balansına verilməsi üçün müraciət ediləcək.
