Quba şəhərinin Heydər Əliyev prospektində quraşdırılan yol nişanları sürücülərin diqqətini çəkib və müzakirələrə səbəb olub.
Shimal.News-a müraciət edən sakinlərin sözlərinə görə, prospektin əsas yolunda hərəkət edən sürücülərin qarşısına "Yol ver" və "Yalnız sağa hərəkət" nişanları qoyulub.
Məsələ burasındadır ki, əsas yolda hərəkət edən avtomobilləri sağa dönməyə istiqamətləndirən nişanın niyə məhz bu nöqtədə quraşdırıldığı aydın deyil.
Daha maraqlısı isə sağ tərəfdəki yolun vəziyyətidir. Sakinlərin sözlərinə görə, təxminən 30 metr sonra həmin yol da bitir.
Belə çıxır ki, sürücüyə mesaj təxminən belədir: "Baş yoldasan, amma sağa dön. Hara? Ora çatanda özün görərsən..."
Sakinlər xüsusilə avtobusların da əsas yoldan hərəkət edərkən sağa yönləndirilməsinin səbəbini anlamaqda çətinlik çəkirlər.
Hazırda həmin nişanların hansı məqsədlə quraşdırıldığı sürücülər arasında əsas müzakirə mövzusuna çevrilib. Güman edilir ki, quraşdırılma zamanı dirəyin səmti əsas yola deyil, bitişik yola olmalı idi.
