Quba şəhərində Olimpiya İdman Kompleksinin qarşısındakı yol nişanı ilə bağlı vəziyyət bir neçə ay ərzində üç dəfə dəyişib.
Shimal.News-un məlumatına görə, məsələ ilk dəfə cari ilin yanvar ayında gündəmə gəlib. Həmin vaxt sakinlər xəbərdarlıq etmişdilər ki, yeni yol nişanı quraşdırılıb və sürücülər dəyişiklikdən xəbərsiz olduqları üçün bilmədən qaydanı poza bilərlər.
Sakinlərin sözlərinə görə, əvvəl Heydər Əliyev prospektindən Quba şəhərinin mərkəzinə dönmək mümkün olduğu halda, yeni nişandan sonra sürücülər yalnız sağ istiqamətdə hərəkətlərini davam etdirməli olublar.
Lakin iki həftə sonra vəziyyət dəyişib. Sürücülərin narazılığından sonra sözügedən nişanın götürüldüyü bildirilib. Bununla da mərkəzə dönmək istəyən sürücülərin yaşadığı çaşqınlıq aradan qalxıb və hərəkət daha rahat təşkil olunub.
İndi isə avqust ayında həmin nişan yenidən quraşdırılıb.
Bu dəfə isə yolun hərəkət sxemində əlavə dəyişiklik də diqqət çəkir. Quba şəhərinin mərkəzinə geri qayıtmaq istəyən sürücülər Olimpiya Kompleksindən bir qədər aşağıda, "arka"nı keçdikdən sonra çəkilən yeni qırıq xəttdən dönərək əks istiqamətdə hərəkət edə bilərlər.
Yəni yanvar ayında sürücüləri çaşdıran nişan yenidən ortaya çıxıb, lakin bu dəfə yolun yeni xətlənməsi ilə birlikdə alternativ dönüş imkanı da yaradılıb.
Beləliklə, Qubada eyni yol nişanının taleyi də maraqlı "xronologiya" yaradıb: quraşdırıldı - narazılıq yarandı - götürüldü - aylar sonra yenidən quraşdırıldı.
Sürücülər üçün əsas məsələ isə yeni nişan və yol xətlərinin aydın və əvvəlcədən başa düşülən şəkildə tətbiq olunmasıdır.
