Quba rayonunun Aşağı Atuc kəndində sürücülər üçün təhlükəli vəziyyət yaranıb.
Sakinlərin Shimal.News-a müraciətinə görə, ərazidə yolun kənarında yerləşən suötürücü kanal gözə görmək praktiki olaraq mümkünsüzdür. Bu isə xüsusilə nabələd sürücülər üçün təhlükə yaradır.
Bildirilir ki, sürücülər yolun kənarında dayanmaq və ya dönmək istəyərkən kanalı vaxtında görmədikləri üçün dərəyə düşür və köməksiz vəziyyətdə qalırlar. Nəqliyyat vasitələrinə zərər dəyir.
Sakinlərin sözlərinə görə, həmin ərazidə dəfələrlə qəza baş versə də, problemin həlli üçün indiyədək müvafiq tədbir görülməyib.
Vətəndaşlar yol kənarındakı suötürücü kanalın yaratdığı təhlükəni aradan qaldırmaq üçün qoruyucu sədd çəkilməsini, yol nişanı qoyulmasını və ya digər təhlükəsizlik tədbirlərinin görülməsini tələb edirlər.
