Quba rayonunun Çinarlı (Alekseyevka) kənd orta məktəbinin qarşısındakı yol yenidən bərbad vəziyyətə düşüb.
Shimal.News-a danışan sakinlərin sözlərinə görə, yaz aylarında yola təmir məqsədilə yamaq vurulsa da, qısa müddət sonra asfalt örtüyü yenidən çöküb. Yağıntılı havalarda məktəbin qarşısında böyük gölməçələr yaranır.
Yolun bəzi hissələrində çökmə o qədər dərinləşib ki, gecə saatlarında bunu görmədən həmin ərazidən keçən avtomobillər zədələnə bilir.
Sakinlər bildirirlər ki, yolun dağılmasının əsas səbəblərindən biri ərazidən hərəkət edən ağırtonnajlı yük avtomobilləridir. Bu nəqliyyat vasitələrinin gündüz saatlarında, saat 18:00-dək həmin yola girişinə məhdudiyyət qoyulsa da, hazırda bəzi yük avtomobilləri nişanın tələbinə əməl etmədən hərəkət edir.
Gecə saatlarında isə yolun ağırtonnajlı nəqliyyat vasitələrinin intensiv istifadə etdiyi marşruta çevrildiyi bildirilir. Sakinlər hesab edirlər ki, məhz bu səbəbdən yolun asfalt örtüyü uzun müddət davam gətirmir.
Onlar problemin, xüsusilə yeni tədris ili başlamazdan əvvəl, aradan qaldırılmasını istəyirlər.
