Quba şəhərinin M.F. Axundov küçəsində sürücülər parklanma qaydaları və tətbiq olunan cərimələrdən narazıdırlar.
Shimal.News-a danışan sürücülərin sözlərinə görə, ərazidə böyük market yerləşdiyindən gün ərzində həm piyada, həm də avtomobil sıxlığı yüksək olur.
Bildirilib ki, avtomobillər yolun hərəkət hissəsinə paralel şəkildə, qaydalara uyğun park edildikdə, ərazidə kifayət qədər nəqliyyat vasitəsi üçün yer qalmır. Bu səbəbdən bəzi sürücülər avtomobillərini yolun imkan verdiyi formada perpendikulyar saxlamağa məcbur olurlar. Onların sözlərinə görə, bu isə cərimələnmə ilə nəticələnir.
Sürücülər hesab edirlər ki, yolun eni və mövcud şərait nəzərə alınaraq həmin ərazidə perpendikulyar parklanmanın təşkil edilməsi mümkündür.
Onlar aidiyyəti qurumdan ərazidə yol hərəkətinin təhlükəsizliyini nəzərə almaqla müvafiq parklanma nişanlanmasının tətbiq edilməsini xahiş edirlər.
Sürücülərin fikrincə, bu halda həm parklanma ilə bağlı yaranan narazılıq aradan qalxa, həm də ərazidə avtomobillərin daha səmərəli yerləşdirilməsi mümkün ola bilər.
