Quba–Qusar yolunun bəzi hissələrində yol örtüyünün çökməsi sürücülər üçün təhlükə yaradıb.
Shimal.News xəbər verir ki, xüsusilə yolun Xucbala kəndi ərazisindən keçən hissəsində 20–30 metrlik asfalt örtüyü digər sahələrə nisbətən aşağı səviyyəyə düşüb. Yolun səthində çatlar və nahamarlıq yaranıb.
Sürücülər həmin hissədən keçərkən sürəti azaltmalı və istiqaməti dəyişməli olurlar. Bu isə qəza riskini artırır.
Sakinlərin sözlərinə görə, problem bir neçə il əvvəl yaranıb. Yaz aylarında yağan intensiv yağışlardan sonra isə yolun vəziyyəti daha da pisləşib.
Analoji problem Qusar şəhəri ərazisindən keçən hissədə də müşahidə olunur. Burada da asfalt örtüyündə çökmələr və nahamarlıqlar yaranıb.
Quba–Qusar avtomagistralı bölgənin əsas yollarından biridir. Sakinlər yolun probleminin aradan qaldırılmasını və təhlükəli hissələrin təmir edilməsini istəyirlər.
