Xaçmazda 43 yaşlı kişi qızına xəsarət yetirib
Hadisə N.Tusi küçəsində yerləşən fərdi yaşayış evində baş verib.
1983-cü il təvəllüdlü Cahangir (ad şərtidir – red.) qızı Kəmalə ilə şəxsi münasibətlər zəminində mübahisə edib. Mübahisə zamanı qızına müxtəlif nahiyələrindən zərbələr endirib.
Cahangir məhkəmədə əməlini etiraf edib. O bildirib ki, qızı qonşuya getmək istədiyini deyib, buna etiraz etdikdən sonra aralarında mübahisə yaranıb.
"Mən törətdiyim əməldən peşmanam. Hesab edirəm ki, qızımı vurmağım tərbiyə üsuludur. Buna görə şikayət edilməsini düzgün hesab etmirəm. Mən qızımı vuranda dəmir dabankeşlə də vurmuşam", - deyə Cahangir bildirib.
Məhkəmədə Kəmalə atasının dediklərini təkzib edib. O, hadisənin anasının ünvanına işlədilən təhqiramiz ifadələrə etiraz etməsindən sonra baş verdiyini söyləyib.
Kəmalənin sözlərinə görə, bu, atasının ona ilk dəfə əl qaldırması deyil. O, əvvəllər də bir neçə dəfə döyüldüyünü bildirib.
Zərərçəkmiş atasının yumruq və dəmir parçası ilə ona zərbələr endirdiyini deyib. Bununla belə, Kəmalə atasından şikayətçi olmadığını və onunla barışdığını bildirib.
Xaçmaz Rayon Məhkəməsinin hökmü ilə Cahangir Cinayət Məcəlləsinin 73.2-ci maddəsinə əsasən cinayət məsuliyyətindən azad edilib.
Onun barəsində olan cinayət işi üzrə icraata bəraətverici əsaslar olmadan xitam verilib.
Mənbə: Demokrat.az
