Zaqatala rayonunun Yuxarı Tala kəndinin dağlıq ərazisində Azərbaycanda ilk dəfə "Boz Qafqaz" dağ arılarının genefondunun öyrənilməsi və damazlığının inkişafı üçün yaradılan təcrid zonada sahə təlimi keçirilib.
Tədbir Kənd Təsərrüfatı Nazirliyi yanında Aqrar Xidmətlər Agentliyinin Aqrar Təlim Mərkəzinin təşkil etdiyi "Arı xəstəliklərinin idarə edilməsi: müasir çağırışlar və biotəhlükəsizlik" proqramı çərçivəsində baş tutub.
Təlimdə yerli və beynəlxalq ekspertlər, baytarlar, dövlət qurumlarının nümayəndələri və arıçılar iştirak ediblər.
Sessiyada arı xəstəliklərinin diaqnostikası, profilaktikası, biotəhlükəsizlik və müasir mübarizə üsulları müzakirə olunub.
Mütəxəssislər bildiriblər ki, son illər Azərbaycanda arı ailələrinin itkiləri müşahidə olunur. İqlim dəyişiklikləri, yağıntılar, quraqlıq və zərərvericilər arıların sağlamlığına və məhsuldarlığına təsir göstərən əsas amillər sırasındadır.
Beynəlxalq ekspert, professor Mustafa Necati Muz isə "Boz Qafqaz" dağ arılarının Azərbaycanın milli genetik sərvətlərindən biri olduğunu bildirib. Onun sözlərinə görə, bu arı növünün xüsusiyyətləri daha geniş araşdırılmalı və qorunmalıdır.
Qeyd edək ki, üç gün davam edən proqramın məqsədi arıçılara müasir və elmi əsaslı yanaşmaları öyrətmək, xəstəliklərin qarşısının alınması və arı ailələrinin qorunması üzrə bilikləri artırmaqdır.
Mənbə: Azərtac
