Quba şəhərinin Dəvədabanı yaşayış massivində yol problemi illərdir həllini tapmır. Qarşıdan yağıntılı hava şəraitinin gəlməsi isə sakinləri yenidən narahat edir.
Shimal.News-a müraciət edən sakinlərin sözlərinə görə, yağış yağan kimi ərazidə yollar palçıq və bataqlığa çevrilir, bəzi küçələrdə isə gölməçələr yaranır.
Onlar bildirirlər ki, bu vəziyyət artıq illərdir davam edir. Yağıntı sularının kənarlaşdırılması üçün lazımi drenaj və kanalizasiya infrastrukturunun olmaması problemi daha da ağırlaşdırır.
Sakinlər deyirlər ki, qarşıdan qış və yağıntılı hava şəraiti gəlir. Bu isə onların eyni problemlə yenidən üzləşəcəyi deməkdir.
"Bilmirik, əziyyətlə qazandığımız pulu ailəmizə xərcləyək, yoxsa yolun yararlı hala salınmasına?" – sakinlərdən biri narazılığını belə ifadə edib.
Məsələnin yalnız yol örtüyü ilə məhdudlaşmadığı bildirilir. Əvvəllər ərazidə yağış sularının axıdılması üçün kanalizasiya və drenaj sistemlərinin olmaması səbəbindən küçələrin su altında qalması, piyadaların, xüsusilə məktəblilərin hərəkətində çətinlik yaranması barədə dəfələrlə məlumat verilib.
Sakinlərin sözlərinə görə, yağış suları bəzən günlərlə ərazidən çəkilmir. Nəticədə küçələrdə iri gölməçələr yaranır, avtomobillərin hərəkəti çətinləşir, piyadalar isə alternativ yollardan istifadə etməyə məcbur qalırlar.
Sakinlər bildirirlər ki, məsələ ilə bağlı aidiyyəti qurumlara dəfələrlə müraciət etsələr də, problem tam həllini tapmayıb.
