Zaqatala şəhərinin sakinləri Qaladüzü məhəlləsindəki baxımsızlıqdan gileylənirlər.
Bizim.Media-nın məlumatına görə, məhəllə şəhərin ən müasir və abad məkanlarından biridir. Məhəllə 10-dan artıq çoxmərtəbəli yaşayış binasını əhatə edir və zaman-zaman burada abadlıq-təmir işləri aparılıb.
Sakinlərin sözlərinə görə binaların qarşısındakı işıq dirəkləri yararsız vəziyyətə düşüb, gecələr işıqlandırma olmur. Eləcə də uşaqlar üçün yelləncəklər keçən ildən düzəltdirilmək adı ilə aparılıb və hələ də təmir olunub geri qaytarılmayıb.
Ən əsası isə bu müasir məhəllədə günün müxtəlif saatlarında mal-qara gəzir. Bəzən blokların qarşısına kimi gələn iribuynuzlu heyvanlar azyaşlıların hərəkətinə mane olur.
Daha bir məsələ həyətdəki su kranlarının susuz qalmasıdır. Sakinlər mərtəbələrdən su gətirərək bu çətin işin öhdəsindən də gəlməyə çalışırlar.
Məsələ ilə bağlı şəhər nümayəndəliyi bildirib ki, qeyd edilən faktlar barədə artıq məlumatlıdırlar. Bu komitə sədr və üzvləri ilə birgə müzakirə olunacaq və mərhələli həlli istiqamətində işlərə başlanacaq.
