Energetika naziri Pərviz Şahbazov 240 MVt gücündə “Xızı-Abşeron” Külək Elektrik Stansiyasının (KES) Abşeron və Xızı sahələrində aparılan tikinti işləri ilə tanış olub.
Shimal.News-un məlumatına görə, nazir “X” sosial şəbəkə bildirib ki, stansiya yaxın vaxtlarda istismara hazır olacaq.
Bərpaolunan enerji Azərbaycanda 400 min evi elektrik enerjisi ilə təmin edəcək. “Xızı–Abşeron” layihəsi Azərbaycanın Energetika Nazirliyi ilə Səudiyyə Ərəbistanı Krallığının “ACWA Power” şirkəti arasında külək enerjisi sahəsində əməkdaşlığa dair Anlaşma Memorandumunun imzalanması ilə reallaşdırılır.
Bu KES Azərbaycanın ilk, Qafqaz bölgəsinin isə ən böyük külək enerjisi istehsal edən qurğusu olacaq. Müqayisə üçün qeyd edək ki, hazırda ölkəmizdə ən böyük külək elektrik stansiyası Xızı rayonunun ərazisində yerləşən 50 meqavat gücündə olan “Yeni Yaşma” stansiyasıdır. Burada hər birinin gücü 2,5 meqavat təşkil edən 20 külək turbini quraşdırıldığı halda, “Xızı–Abşeron”da isə hər birinin gücü 6,5 meqavat olan 37 ədəd külək turbini fəaliyyət göstərəcək.
