Xaçmazda 32 il yaşayan Kəlbəcərdən olan 20 ailə böyük qayıdışa hazırlaşır.
ShimalNews “İTV”-yə istindən xəbər verir ki, Nabran qəsəbəsindəki istirahət mərkəzlərinin birində məskunlaşan məcburi köçkünlər böyük yurd hissi ilə yaşayırlar.
Erməni işğalı zamanı Xaçmazda məskunlaşan 75 yaşlı Fərman Salmanov Çaykəntdən, həmyaşıdı Kərim Əliyev isə Başlıbeldəndir. Həmin faciəyə qədər bir birini tanımayan bu ağsaqqallar Xaçmaz rayonunda məskunlaşdıqdan sonra dostlaşıblar. Onlar Kəlbəcərin qanlı işğal gününü hər gün xatırlayır, qarlı-sazaxlı Murov dağından aşarkən üzləşdikləri faciələri göz önünə gətirirlər.
“1993-cü ilin martın 31-də Kəlbəcərdən, öz kəndimizdən çıxmışam. Qarlı-boranlı gündə gəlmişik Gəncəyə, orada qərargah yaradmışdılar, gəldik həmin qəraragahda, elə bil qeydiyyata alırdılar. Ordan da aprelin 8-də avtobusa yığdılar göndərdilər bura”, - deyə Fərman Salmanov bildirib.
Kəlbəcəri yalnız televizorda görən 15 yaşlı Cavid də doğma yurda yollanacaq günü yuxularında, xəyyalarında canlandırır:
“Atam Kəlbəcərdəndir, babam Kəlbəcərdəndir, mən Kəlbəcəri ancaq televizorda görmüşəm. Kəlbəcərə getmək mənim ən böyük arzumdur. İnşallah gedərəm. Yeni tikilmiş binalarda, daha təmirli evlərdə gedib yaşamaq istəyərəm”, - deyə Cavid Salmanov bildirib.
Həmin gün uzaqda deyil, yenidən qurulan Kəlbəcər tezliklə əzəli sakinlərinə əbədi qovuşacaq. İşğal zamanı oradan 53.340 nəfər öz doğma yurdundan qovulub.
Посмотреть эту публикацию в Instagram
