Xaçmaz Rayon Mərkəzi Xəstəxanasında "Övladınızı peyvənddən yox, peyvənd ilə qarşısı alına bilən xəstəliklərdən qoruyun" mövzusu altında maarifləndirici tədbir keçirilib.
ShimalNews xəstəxanaya istinadən xəbər verir ki, valideynlərə peyvəndin önəmindən bəhs edilib, eyni zamanda ölkəmizdə uşaqlara vurulan peyvəndlər haqqında məlumatlar verilib, onları maraqlandıran və narahat edən suallar cavablandırılıb.
Tədbirdə Gigiyena və Epidemiologiya mərkəzinin Epidemioloji şöbəsinin müdiri Saleh Pirəliyev, Xaçmaz Rayon Mərkəzi Xəstəxanası İlkin Səhiyyə Xidmətinin şöbə müdiri Şəfa Kərimova və valideynlər iştirak ediblər.
Bildirilib ki, hazırda Azərbaycanda hepatit B, vərəm, poliomielit, difteriya,tetanus, göyöskürək, B tipli hemofil infeksiya, pnevmokokk bakteriyalarına qarşı, qızılca, məxmərək, parotit xəstəliklərinə qarşı peyvəndlər mövcuddur. Peyvəndlərin zəncirvari tətbiq edilməsində məqsəd uşaqların immunitet qazanması və yoluxucu xəstəliklərə yoluxmamasına nail olmaqdır.
