Xaçmazda təbiətə ziyan vuranlara qarşı cinayət işi açılıb. Bu barədə ShimalNews 27 avqust tarixində Baş Prokurorluğa istinadən məlumat verir.
Azərbaycan Respublikası Baş Prokurorluğuna daxil olmuş vətəndaşların ərizələri, kütləvi informasiya vasitələri və səlahiyyətli dövlət qurumlarının məlumatları əsasında qanunsuz ağackəsmə faktları ilə bağlı araşdırma aparılıb.
Araşdırmalar nəticəsində Xaçmaz meşəbəyliyinin 1 və 6 saylı dolaylarında meşə fonduna daxil olan ağac və kolların qanunsuz kəsilməsi, həmin ərazinin qanunsuz şumlanması və əkilməsi faktları aşkar edilib.
Fakt üzrə Cinayət Məcəlləsinin 188.1 (torpaq üzərində mülkiyyət, istifadə və ya icarə hüququnu pozma), 259.2.4 (qanunsuz ağac kəsmə külli miqdarda ziyan vurmaqla törədildikdə) və digər maddələri ilə cinayət işləri başlanılaraq istintaqın aparılması üçün aidiyyəti üzrə daxili işlər orqanlarına göndərilib.
